He maha ngā mea ka taea te whakatinana, hei whakapiki i ngā putanga mō te hunga māuiui, whai hauātanga rānei, me ngā kaitaurima
Ko ngā tāngata whiwhi penihana nā te mea he māuiuitanga, he hauātanga rānei tō rātou, e tiaki ana rānei i tētahi tangata māuiui, hauā rānei, kei te 53% o ngā tāngata whiwhi penihana i te pakeke e haere ai ki te mahi. He maha rātou he tahangoi ngā hua papai o ngā mahi. He maha tonu ka whiwhi i ngā penihana hauora, hauātanga hoki, kua pāngia e ngā mate hinengaro kāore kē nei i te pai te tautoko. Mā te māuiui, te hauātanga i takea mai i ngā pūtake pāpori, ōhanga, hinengaro, āhuatanga tinana rānei, ka uaua kē atu te urutomo ki te pūnaha oranga. He pānga taumaha tō te koremahi ki te hauora me te toiora o ngā tāngata whiwhi penihana. Ahakoa rā, kāore anō kia tino whai hua ngā urupare kaupapa here ki te whakapikinga hua mō te hunga whiwhi penihana hauora, hauātanga, ā, he auau tonu te whiwhi o te tangata i aua penihana mō te wā roa.
Ko te hunga māuiui, hauā rānei i roto i te pūnaha oranga ka whiwhi pūtea tino iti kē iho, ine hoki i ētahi atu tahua o te tangata, me te uauatanga ake o tā rātou uru ki ngā ratonga hauora, tēnā i te hunga ka āhei kia whiwhi kapeheihana aituā. Mō te nuinga he rahi kē atu ngā āwhina pūtea ka tukua ki te tangata e te Kāporeihana Āwhina Hunga Whara (ACC) i te taumata ka horaina e te Manatū Whakahiato Ora mō taua taumata o te pīkauranga hauā. Ko ētahi tāngata māuiui, hauā hoki, ehara nei i te hauātanga nā tētahi aituā, ka kapea mō ngā whiwhinga pūtea me ngā tautoko hokinga ki te mahi mai i ACC, i MSD rānei, nā runga i ngā ture mō te noho-hei-tokorua mō te āwhina pūtea.
Ko ngā tāngata takitahi ka whiwhi penihana kei te pāhekeheke tonu te tū, ko ētahi kāore e whiwhi pūtea tika. Ko te nuinga o ngā tāngata whiwhi penihana hauora, hauātanga hoki, he takakau. He nui tonu te utu o te noho hei tangata māuiui, whai hauātanga rānei, o te noho rānei hei kaitiaki mō tētahi tangata kua pāngia nei e tētahi māuiui, hauātanga ranei. Ahakoa ēnei āhuatanga, he ngoikore noa te urupare o te pūnaha, me te aha, ka mate ngā tangata whiwhi penihana ki te kōpikopiko noa ki waenga i ngā tātaramoa o ngā pūnaha hauora, oranga hoki, e whiwhi ai rātou ki ngā tautoko tika mō rātou.
Mō ngā tāngata whai māuiuitanga, hauātanga hoki, mā te whakauru ki te mahi pai, tōtika, i te wā e tika ana, e tautoko te oranga tangata. Ahakoa rā, he iti noa te pānga o te pūnaha oranga ki te tautoko i ngā tāngata whai māuiuitanga, hauātanga rānei kia uru ki ngā mahi toitū. He whāiti hoki ngā tomokanga mā ngā kaitiaki i ngā tāngata māuiui, hauā hoki kia hoki ki te mahi e utua ana, ina taea te pērā, i roto i te pūnaha oranga.
E marohi ana mātou kia whakapikia te hauora me te toiora o ngā tāngata whai māuiuitanga, hauātanga hoki, tae atu ki ngā kaitiaki o te hunga māuiui, hauā hoki e tūtaki nei ki te pūnaha oranga, mā te:
- horanga mai o te tautoko ā-pūtea tika e pai ai te noho o te tangata i te ao nei, he ōrite hoki puta noa i te rāngai pāpori
- whakatinanatanga whānui o ētahi ara nā ngā taunakitanga i waitohu hei tautoko i ngā tūtakinga ki ngā mahi pai, tōtika hoki mā te hunga e taea ai
- whakatinanatanga o ētahi rautaki hei ārai i ngā māuiuitanga me ngā hauātanga e uaua ai te mahi mō te tangata.