E tāpae painga ana hoki te hunga kāore i ngā tūranga whiwhi utu
Ehara i te mea ka taea e te katoa te whakuru ki ngā mahi whiwhi utu. Kua takoto i konei he whāinga wāhi kia kī tātou he tāpaetanga nui tō te hunga e mahi i ngā mahi kore utu (pēnei i te taurima i te tamariki, i te hunga hauā, i ngā kaumātua me te hunga mahi ohu mō ngā rōpū ā-hapori, me ngā hinonga ahurea, auaha rānei). Me whakaae te katoa, me whakanui hoki te katoa i te hua nui o ngā mahi taurima tamariki, me ētahi atu, me te mahi ohu i te hapori o te tangata.
Waihoki, me whakaū katoa tātou e tika ana kia noho pai te tangata i tēnei ao ahakoa kāore ia e āhei ki te mahi mō te wā roa, nā te māuiui, nā te hauātanga rānei. He whāinga tika taketake tēnei nō te tangata. Me tuitui e Aotearoa āna rautaki ōhanga, pāpori hoki, kia wātea ai ki ōna kirirarau katoa ngā huarahi tāpae painga ki tōna ōhanga, ki tōna pāpori nui tonu, ki tōna tuakiri auaha, ahurea hoki, ki ōna hapori me ōna whānau.
Kāore e rahi te huringa tīmutumutu noa iho - me hoatu he huringa puta noa i te pūnaha katoa i ōna wehewehenga katoa
Kāpā e noho tauwehe ana te pūnaha oranga i ētahi atu āhuatanga o tō tātou whenua. Ki te hiahia tātou ki te whakapiki i ngā putanga mō te hunga whiwhi pūtea iti, mō te hunga whiwhi tautoko i te pūnaha oranga rānei, me mātua tautoko te kāwanatanga katoa. I tēnei rā, ki te noho te tangata i te penihana/i te rawakore rānei, ka pā ki te oranga o te tangata mō te wā roa, ahakoa pakeke, ahakoa tamariki.
He maha ngā take ka whiwhi tautoko oranga te tangata, ā, he tini ngā pūtake ā-pāpori, ā-ōhanga, ā-hinengaro, ā-āhuatanga tinana hoki. E kore e taea ēnei āhuatanga te whakamahu te whakamirimiri atu rānei e te pūnaha oranga anake. Ko ngā āhuatanga ka pā i ētahi atu wāhanga o te pūnaha hei kōmiri i te āhua o te hunga ka tomo ki te pūnaha oranga, me ngā putanga mā ngā tāngata takitahi me ngā whānau e tautokona ana e tēnei pūnaha. Mā te whakapiki putanga hua mā te hunga whiwhi tautoko i te pūnaha oranga mā te whakatūturu haumitanga nā ngā taunakitanga i tautoko, puta noa i te rāngai pāpori ināianei, e puta ai he hua mā ngā tāngata takitahi me ngā whānau, e penapenatia ai he moni nui i roto i ngā tau mā te motu katoa.
Tērā ētahi rōpū tāngata, whānau nunui he nui ngā pīkauranga taumaha, mō te wā roa ka tau ki runga i a rātou, me tō rātou hiahia ki ngā āwhina mai i ngā pūnaha kāwanatanga maha. Me noho anō he pūnaha tautoko, ngākau aroha, aronui ki te tangata, e piki ai ngā putanga mō tēnei hunga. Ko te korenga e tōtahi o ngā mahi o ngā ratonga kāwanatanga tētahi tangi i rite tonu te whakaputa, i ā mātou hui.
Tērā ētahi arotakenga, huringa kei te haere i tēnei wā, meāke ka tīmata ētahi anō, e taea ai te whiriwhiri tikanga papai mō te hunga kei ngā whiwhinga pūtea pāpaku, whiwhi tautoko, momo tautoko rānei, i te pūnaha oranga.
Tā tā mātou arotake he takoha ki te huhua o ngā taunakitanga e kī ana, me huri ngā mea taketake, me whakatinana ngā tikanga whakamana tāngata i te ao tautoko oranga tangata – he tikanga ēnei e tupu ai te tūmanako o te tangata mō ngā rā kei mua i te aroaro. Nō reira, kia manawanui, kia piki ake te mana tangata.