Na te ture o Aotearoa e mōhiotia nei ko te Social Security Act 1938 ka oti tētahi whakaaetanga pāpori te whakapūmau i waenga i te Kāwanatanga me ōna kirirarau katoa.
Mā te Kāwanatanga e hora tētahi pūtea āwhina mā ngā tāngata o Aotearoa kāore i te whiwhi āhuatanga noho tōtika (e noho nei tēnei ritenga hei pou taketake mō te pūnaha oranga pāpori), i te taha o ētahi atu tautoko matua pēnei i te whāinga wāhi ki te hauora, ki te mātauranga, ki te whāinga whare me te whiwhinga mahi tōtika. Ko te utu mā te tangata whiwhi, inā ra, ko ngā tāngata ka whiwhi tautoko ā-pūtea ka uru ki te whakangungu me ētahi atu mahi, me te kimi mahi i ngā wāhi hoki e tika ana. Kua parori te tū o te whakaaetanga pāpori.
He mea pou tūturu te pūnaha o nāianei ki ngā herenga maha, me ngā whakawhiu mō te tahangoi o te tangata, he mea āta whakahāngai mārire, ā, kāore hoki i te rahi te tautoko mō ngā hiahia taketake noa o te tangata. Kāore i te pai ōna āhuatanga ki te hunga whakauru ki te pūnaha ināianei, ā, he tūkino tāna mahi i ētahi o ngā tāngata nui rawa atu ngā taumahatanga, mutunga mai hoki o te rawakore. I rongo mātou i ā mātou mahi torotoro i te iwi, nā te pūnaha nei kua ngaro te whakapono o te tangata ki āna mahi, kua whakatakariri, kua kiriweti te tangata, kua tino taumaha rawa te pōkaikaha. He iti noa ngā rangahau e tautoko ana i te whakamahinga o ngā haepapa me ngā whakawhiu (pērā i te pūnaha o nāianei) hei huri i te whanonga o te tangata; otiia he rangahau tonu e tautoko ana i te whakaaro, hei take ēnei mō te wharanga pāpori me te kōunu ki waho. E mea ana ngā rangahau o nā tata nei kia waiho atu aua tū ritenga, me anga kē atu ki ngā ratonga i āta whakawhaiarotia. E mea ana mātou, e tika ai e whai hua ai te pūnaha oranga hei hora i tētahi whāinga hōu, i ētahi mātāpono hōu, uara hou, me whakapono ngā taha e rua tētahi ki tētahi, arā, me pērā anake ka tika ngā mahi.
Nā ēnei āhuatanga, e tāpae ana mātou i te whakaaro kia tū he pūnaha whakamana tāngata – e riro ai mā ngā moemoeā me ngā haepapa o tētahi taha, o tētahi taha e whakatere te ihu o te waka, e whakaruru ngā mahi i waenga i te kāwanatanga me te hunga whiwhi pūtea oranga. He whakapiripono tēnei ki te whakapiki toiora, mā te tautoko i ngā hua wā-roa mā te tangata takitahi, tae atu ki ngā pūkenga me te āheinga ao kaimahi pai ake. I raro i tēnei whāinga me mātua whakahōu wawe ngā āhuatanga haepapa, whakawhiu hoki o nāianei.
Me awhi ēnei wawata, haepapa hoki i te noho o te tangata takitahi kia tutuki ai ngā uara o te pūnaha e marohitia ana, me noho mai hoki he arohaehae, he huarahi whakatikatika i ngā paroritanga, hei ārai i te kino kia kaua ai e pā ki te tangata takitahi me tōna whānau. Ko te tūmanako matua o te hunga whiwhi me te Kāwanatanga kia mahi i runga i te whakamana i te tangata kē, me te whakaaro rangatira, i ngā mahi a tētahi, a tētahi.
He maha tonu ngā tāngata o Aotearoa e tino hēmanawa ana te noho, nā te iti o te moni – me mātua whakatikatika tēnei āhua
He nui ngā tohu e taunaki ana i te kī kāore i te rawaka ngā whiwhinga pūtea mō ngā tāngata katoa, te hunga ka whiwhi i te penihana, me ērā kei ngā taumata utu o raro rawa. Kāore nga taumata tautoko o nāianei e rahi mō ngā utu taketake o te noho mō te tini o te iwi, otiia mō te whai wāhi nui ki ō rātou hapori, tino kore rawa atu e taea. E haere tahi tonu ana ēnei mea e rua i Aotearoa, te whiwhinga penihana me te rawakore. E tino pāngia ana te iwi Māori, ngā iwi o Te Moana-nui-a-Kiwa, ērā e pāngia ana e ngā mate hauora, e ngā hauātanga, me te rangatahi.
He maha ngā puna kōrero i koutuhia ai te tahā mō tēnei pūrongo, ko ā mātou torohanga, huihuinga hoki ki ngā hapori tērā, ko ngā rangahau ki ngā whānau tauira tērā, ko ngā tātaritanga i ngā pānga o te rawakore me te taumahatanga rukiruki i Aotearoa tērā (me te aro nui hoki ki ngā whānau whai tamariki me te hunga whiwhi penihana).
He maha ngā putanga mauroa, putanga kino o te noho i roto i te rawakore mō ngā tāngata whiwhi penihana, mō ā rātou tamariki, whānau, otirā te iwi katoa. He nui ngā kōrero e tohu ana i ngā pānga kino o te rawakore ki ngā putanga torowhānui o te tamariki, tae atu ki te māramatanga hinengaro, te ekenga paetae kura, me te whanaketanga hauora, pāpori, kare ā-roto, whanaketanga whanonga anō hoki. Tēnei ka puta ngā taunakitanga o te pānga o te rawakore ki te hauora hinengaro o ngā tāngata ahakoa te pakeke, arā, ngā reanga katoa.
Me whakapiki hoki te Kāwanatanga i ngā whiwhinga pūtea mō ngā tāngata whiwhi pūtea katoa, pāpaku rānei te utu, me te whakapūmau i ēnei whakapikinga i te takanga o ngā tau kia noho ōrite ki ō te nuinga o te hapori. Me turaki tonu hoki e te Kāwanatanga ngā maioro ārai i te ara o te tangata ki ēnei tautoko, me te whakaū i tētahi pūnaha oranga e whakamanaia ai te tangata kia tū rangatira ki te ao.