Mutual Expectations

Te Kaupapa

Te Mahi

Anga tūmanako o tētahi o tētahi

Me whakahou ngā ritenga here, whakawhiu hoki kia noho kē he pūnaha tūmanako, haepapa hoki mō tētahi, mō tētahi, me hoatu ēnei e ai ki ngā āhuatanga o te tangata, kia hāngai tonu ki te whāinga, ngā mātāpono me ngā uara e marohitia ana. Me noho he maioro pakari tonu kei pā ētahi āhuatanga kino ki te tangata takitahi me tōna whānau. He mea āta paihere tonu tēnei huarahi hou ki te whakapiki oranga me te tautoko i ngā pūmanawa kua oti te whakapiki ake, me te āheinga ao tuku mahi o te tangata takitahi, o tōna whānau rānei.

Ngā here me te tango whakawhiu

Tangohia:

• te here kia whakaotingia ētahi mahi i āta tautohutia i mua i te tukunga o tētahi penihana (ngā ngohe o mua i te penihana)
• te whakawhiu e mutu ai ngā utunga penihana mehemea kua pānuitia he wārani mauhere i taua tangata, me haere tonu te whakaōrite raraunga ki te Tāhū o te Ture, me te whaiwhai tonu kia whakapāngia atu ēnei tangata i runga i te wairua tautoko, atawhai hoki.
• ngā here pāpori e whakahau ana me mātua whai ngā tāngata katoa kua whiwhi penihana kia rēhitatia ā rātou tamariki ki tētahi pūtahi tākuta, kia hou katoa ngā tirohanga Wellchild/Tamariki Ora, kia haere hoki ki tētahi pūtahi kōhungahunga, kura rānei
• te whakamātautau tarukino, pire hoki i mua i te mahi, ā, me hoatu āwhina mātanga mā te hunga whai māuiuitanga whakamahi tarukino, pire hoki
• te arotake āheinga mahi e whakahautia ana mā te hunga kua pāngia e ngā māuiuitanga, e te hauā rānei, ā, me hono ngā arotake āheinga mahi ki ngā mahere hoki ki te mahi
• te here kia tono anō te tangata mō te penihana ia 52 wiki – ko te whakaritenga kia hora Te Manatū Whakahiato Ora i ngā whiwhinga katoa, kia tika hoki te tātai, mā ngā arotake auau (kaua e iti iho i te kotahi arotake i te tau)
• ngā here mahi, ina whakauru tētahi tamaiti ki tētahi penihana (te tamaiti whai i muri)
• te whakawhiu mō te kore e whāki i te ingoa o tētahi atu matua ( ko te wāhanga 70A tēnei o te Social Security Act 1964 i mua, ināianei koe wāhanga 192 o te Social Security Act 2018).

Me hāngai ngā rauemi me ngā tukanga o te ratonga anga ki te hunga-tūmatanui, mahi hoki i waenga i te tangata, ki te whāinga me ngā mātāpono hou

Whāngaia ngā ratonga āwhina tangata ki te taumata e tika ana kia tutuki ngā putanga, hei mahi mātāmua.

Whakatinanatia he rautaki whakangungu kaimahi mutunga kore, torowhānui, hihiri, kakama hoki.

Whakaūngia tētahi tukanga tāpae amuamu e inea ai tōna tikanga i runga i te pai o te takawaenga, me te whakahoahoa o ngā taha e rua.

Meatia te tukanga arotake kia ngāwari ake, kia horo ake, kia wātea ake, kia tairanga te mātāpono o te whakawā tika mō te tangata i ngā wā katoa.

Whakawāteatia he rongonga tuarua i te Mana Pīra mō te Oranga Pāpori ki ērā kua kawea e rātou he take kāore i tutuki ki te Poari Pīra Taha Tākuta.

Tautapangia te hunga tērā pea ka whiwhi penihana mō te wā roa, he matahuhua rānei ngā hiahia ki tētahi kaiwhakahaere takitahi mō te tangata, me hoatu hoki ki aua kaiwhakahaere he kawenga kēhi iti iho kia pai ai tāna whakatikatika i te toiora o te tangata whai hiahia me tōna whānau.

Me whāngai i te kāhui kaimahi kia tika, me whakaarorangi ngā pūnaha i runga anō i ngā kōrerorero ki ngā kāhui kaimahi āwhina tangata, kia pai ai te rerenga mahi me ngā wheako o ngā kiritaki ratonga.

Meatia te tangata kia noho ki waenga pū o te whakatau take, rapua he whakahokinga whakaaro mai i ngā kaimahi mō te pānga o ngā huringa pūnaha ki ō rātou tūranga, whakamanaia hoki ngā kaimahi kia kōkiri whakamua ngā mahi whakapiki i te mana o te hunga whiwhi penihana.

Hoatu huarahi maha mō te whiwhi ratonga kia pai ai te urutomo ki te āwhina a ngā kaitono ahakoa he aha te huarahi pai ki a rātou.

Whāia te huarahi i tauiratia ai e Whānau Ora, e kitea ai ngā tari maha mehemea he matahuhua ngā hiahia o tētahi tangata, kia noho hoki he kaiwhakatere matatau hei tautoko i ngā tūtakitanga a te tangata ki ngā tari me ngā rōpū hapori.

Te Kaupapa

Te Mahi

Ngā huarahi whakaheke i te hanganga utunga tuhene, whakaheke hoki i te noho nama whānui

Tirohia ngā utunga taimahatanga katoa, āta whakaritea hoki he tikanga kia noho hāngai tonu te āheinga ki te whāinga me ngā mātāpono hou o te Social Security Act. 

Hoatu ki te Manatū Whakahiato Ora te mana kia whakapiki, kia whakangāwari kia whakahoahoa hou i ngā tikanga mahi e pā ana ki ngā whakapuakanga whiwhinga pūtea.

Me whakapiki i te whāngainga mō ngā kōkiri ā-hapori hei whakapiki i te māramatanga taha pūtea, whakaheke nama hoki, pēnei i ngā moni taurewa huamoni-kore, utunga kore, whakakotahi nama hoki.

Whakaurua he kaupapa whakapoapoa i te tangata kia utu nama penihana, pēnei i tētahi Kaupapa Whakaheke Nama Takirua, hei whakaheke i ngā nama penihana.

Arotakea ngā ritenga mahinga whakaroto e pā ana ki te nama, me te whakahāngai i ēnei ki te whāinga me ngā mātāpono hou.

Te Kaupapa

Te Mahi

Te whakaheke rawa i te iti o te hara tāware

Whakapikia te kōkiri papatoru o te Manatū Whakahiato Ora ki te Hara Tāware e whakapaetia ana.

Whakaurua he whakawā arotake motuhake i mua i tētahi Komiti Arotake Penihana mō ngā wherawheratanga hāmene.

Tūhuratia, whakahāngaitia ngā tikanga hāmene ki te huarahi e whāia nei e te Tari Taake mō te Hāmene.

Te Kaupapa

Te Mahi

Te whakapiki i ngā ratonga mā te hunga puta i te whare herehere

Me whakapiki te wawaotanga Supporting Offenders into Employment me ngā mahi whakahoki i te tangata ki te ao whānui a Manatū Whakahiato Ora, i te taha o Ara Poutama Aotearoa. 

Me whakawhānui ngā taurimatanga mā te hunga ka puta i te whare herehere.

Me arotake, me whakarahi hoki te uara o nāianei o te pūtea Steps to Freedom, kia tōtika ai mō ngā utu o ia rā, tae atu ki te whare. 

Me aroturuki ngā mauhere, me te whakarite tikanga kia whai pukapuka tika e whiwhi ai rātou ki te tautoko pūtea, ki te mahi rānei i te putanga ki waho (inā koa, me momo waitohu tangata tika, he raihana taraiwa, he pūtea pēke, me ētahi taipitopito hoapā).

Me āta whakaaro mō te kawe haere tonu i te āwhina utunga whare mō te hunga e whakauru ana ki te herehere mō te wā poto, ahakoa noho tārewa i te whare herehere, ahakoa puritia ohoreretia rānei.