Ko e founga fili
1. Ngaahi tu‘utu‘uni ‘o e COVID-19
‘E tui ‘ufi‘ufi mānava (masks) kotoa ‘a e kau ngāue ‘i he ‘ū fai‘anga fili. ‘Oku mau fakatauange te ke tui ‘ufi‘ufi mānava mo koe foki. ‘E ‘i ai pe ‘a e ‘ufi‘ufi mānava ‘e ma‘u atu kapau te ke fiema‘u ia. ‘E ‘i ai mo e faito‘o fanofano ke ngāue‘aki, pea kapau ‘e faingamālie, to‘oto‘o mai ha‘o peni ke fakafonu ‘aki ho‘o pepa fili.
2. Ha‘u mo ho‘o kaati fili EasyVote card
To‘oto‘o mai ho‘o kaati fili EasyVote card he ‘e vave ange ai ho‘o fili. ‘E kei lava pē ke ke fili kapau ‘e ngalo ke to‘oto‘o mai ho‘o kaati, pe ‘oku te‘eki ‘i ai ha‘o kaati.
3. Muimui ki he ngaahi fakahinohino
‘E fakahinohino atu pē ‘e he kau ngāue ‘i he ‘ū fai‘anga filí ‘a e me‘a ke faí mo e feitu‘u ke ke ‘alu ki ai. Tenau toe tokanga‘i foki mo e tu‘u lainé ke ‘atā ‘a hono fakahokohoko e kau fili.
4. Kau ‘i he Fili-Si‘i ‘a e vāhenga fili Tauranga
‘Oku taha pē ‘a ho‘o fo‘i filí, ‘a ia ko ho‘o fili‘i ‘a e kanititeiti ‘oku ke loto ke ne fakafofonga‘i ‘a e vāhengá ‘i Falealea.
‘Oku kehe eni ia mei he fili lahi, ‘a ia ‘oku ua ai ho‘o fo‘i fili - fili ‘e taha ki he paati pea mo e fili ‘e taha ki he kanititeiti ‘o e vāhenga filí.
5. Ko ho‘o fili fakavāhenga
Ko ho‘o fili fakavāhengá ko ho‘o fili ia ha kanititeiti ‘oku ke fiema‘u ke hoko ko e fakafofonga Falealea (MP) ‘i he feitu‘u ‘oku ke nofo ai. Ko e kanititeiti ‘e tokolahi taha ‘a e kakai ‘e fili aí ‘e hoko ia ko e fakafofonga (MP) ‘a ho‘o vāhengá.
‘I ho‘o pepa filí, tiki‘i e hingoa ‘o e kanititeiti ‘oku ke fiema‘u ke ne fakafofonga‘i ho vāhenga.
6. Fa‘o ho‘o pepa filí ‘i he puha pāloti ‘oku fokotu‘u ai
Pea ko ‘ene lavá ia - kuo lava ho‘o fili!
Ko e feitu‘u ‘e ma‘u mei ai ha fakahinohino fekau‘aki mo ho‘o lēsisitá pea mo fili
- Vakai ki he uepisaiti nz
- Tā ki he 0800 36 76 56
- Vakai ki he com/voteNZ
Kapau te ke ‘ilo ha taha ‘e ‘aonga ki ai e ngaahi fakamatala ko ení pea ke kātaki ‘o fakaa‘u atu ki ai.
‘Oku toe ma‘u atu foki ‘i he ‘ū lea kehekehe ‘a e ngaahi fakamatala ki he lēsisitá mo e fili, ‘i he vote.nz
‘Oku ‘ikai ke ke lava atu ki ha fai‘anga fili?
Kapau ‘oku faingata‘a pe ‘ikai malava ke ke lava atu ki ha fai‘anga fili, ‘oku ‘i ai e ngaahi founga ‘e ala tokoni ke fakapapau‘i te ke kei lava pē ‘o fili. Kapau ‘oku ke nofo ‘i ha nofo‘anga tauhi vaivai (rest home), ‘e fetu‘utaki ‘a e Pule Faifili (Electorate Manager) ki he pule ‘o e nofo‘angá ke alea‘i ha founga ke fakahoko ‘aki ho‘o fili.
Kapau ‘e ‘ikai te ke lava ki ha fai‘anga fili koe‘uhi ‘oku ke tokoto falemahaki, mei he ‘aho Tokonaki 4 ‘o Sune, ‘e lava pe ke ha‘u hao fāmili pe maheni ‘o ‘omai ho‘o pepa fili.
Kapau ‘e ‘ikai te ke lava ki he fai‘anga filí koe‘uhi ‘oku ke puke he COVID-19 pe nofo mavahe (isolating), pe koe‘uhi ‘oku ‘ikai ke ke mo‘ui lelei, pe faingata‘a‘ia fakasino, ‘e lava pe ke ma‘u atu ha tokoni ke ke lava ‘o fili.
Fakaikiikí ‘oku ma‘u ia ‘i he vote.nz pe tā ki he 0800 36 76 56 ‘o talanoa mo ha taha ki he ‘ū founga.
Fili mei tu‘apule‘anga
Kapau te ke fili mei tu‘apule‘anga, kuopau ke ke lēsisita kimu‘a he tu‘uapō Falaite 17 ‘o Sune. ‘E lava ke ke lēsisita pe fakatonutonu ‘a e ngaahi fakamatala fekau‘aki mo koe ‘i he vote.nz
‘E lava ke ke fili mei tu‘apule‘anga mei he ‘aho Pulelulu 1 ‘o Sune ‘o ngata ki he 7.00pm Tokonaki 18 ‘o Sune (Taimi ‘o New Zealand).
Ko e founga vave mo faingofua taha ki he fili mei tu‘apule‘angá ko hono taunilouti (download) mo fakafonu ho‘o pepa filí pea toki ‘apulouti (upload) ‘i he vote.nz
‘E malava pe foki ke ke a‘utonu ‘o fakahoko ho‘o filí ‘i he fai‘anga fili tu‘apule‘anga ofi taha atu kia koé, pe ko fē pe ha feitu‘u ‘i tu‘apule‘anga ‘oku ke ‘i ai, pe kole ha pepa fili ke meili atu kia koe. Kapau ‘e ‘ikai lava ke fakahoko ho‘o filí ‘i he ngaahi founga ko ení, kātaki ‘o fetu‘utaki mai. Ko e ngaahi founga fili ko ení ‘e tefito pe ia ‘i he tūkunga ‘oku ‘i ai e COVID-19 ‘i he feitu‘u ‘oku ke ‘i ai.
Vakai‘i e vote.nz ki he fakamatala fakamuimui taha fekau‘aki mo e fili mei tu‘apule‘anga. Kapau te ke fiema‘u ha tokoni ki he fili mei tu‘apule‘angá, kātaki ‘o fetu‘utaki mai .
‘Imeili: overseas@vote.nz
Telefoni mei tu‘apule‘anga: +64 9 909 4182 (‘e malava ke totongi ‘i he mahu‘inga tā fakavaha‘a pule‘anga)
Telefoni ‘i loto New Zealand: 0800 36 76 56
Fiema‘u tokoni ki hono lau mo fakafonu ho‘o pepa fili?
‘E lava ke tokoni‘i koe ‘e hao fāmili pe maheni pe ha ‘ofisa faifili ke lau mo fakafonu ho‘o pepa filí. ‘E lava e tokotaha ko iá:
- ke mo hū fakataha ki he puha fai‘anga fili
- lau ‘a e fakamatala ‘oku hiki ‘i he pepa fili
- fakafonu ho‘o pepa filí kapau te ke loto ki
‘E ‘ikai ngofua ke ne tala atu kia koe ‘a e taha ke ke fili ai ‘i he Fili-Si‘i ‘a Tauranga.
Kapau ‘oku ke kui, po‘uli ho fofongá pe mo‘ua ‘i ha faingata‘a‘ia fakasino ‘o ‘ikai lava ke ke fakafonu ho‘o pepa filí, ‘e lava ke fakahoko ho‘o filí ‘aki e telefoni fakaongo (phone dictation service).
‘E fiema‘u ke ke lēsisita kapau ‘e fiema‘u ke ke ngāue‘aki ‘a e founga ko eni. Tā ki he 0800 028 028 ‘o fili e option 1 ‘o lēsisita ai.
‘E lava ke ke lēsisita mei he ‘aho Tu‘apulelulu 12 ‘o Mē ‘o ngata ‘i he 12pm Tokonaki 18 ‘o Sune.
Vakai ki he uepisaiti vote.nz ‘o ma‘u mei ai e fakaikiiki fekau‘aki mo e founga ko eni.