E kore e taea e te whenu kotahi
ki te raranga i te whāriki
kia mōhio tātou ki ā tātou.
Mā te mahi tahi o ngā whenu,
mā te mahi tahi o ngā kairaranga,
ka oti tēnei whāriki.
I te otinga
me titiro tātou ki ngā mea pai ka puta mai. Ā tōna wā,
me titiro hoki
ki ngā raranga i makere
nā te mea, he kōrero anō kei reira.
The tapestry of understanding cannot be woven by one strand alone.
Only by the working together of strands and the working together of weavers will such a tapestry be completed.
With its completion let us look at the good that comes from it and, in time
we should also look at those stitches which have been dropped, because they also have a message.
Nā – Kūkupa Tirikatene 1934–2018
He mihi
E ngā mana puipuiaki, e ngā reo tongarerewa e ikapahi nei, tēnā koutou katoa
Tukuna kia rere ngā mihi ki te Atua,
ko ia te tīmatanga me te whakamutunga o ngā mea katoa
Te hunga kua poto ki te pō, haere koutou Tātou e mau tonu nei i te hā o te ora,
Tēnā koutou, tēnā koutou, tēnā tātou katoa
He kupu wāwāhi i te kaupapa nā te Heamana
Nā te kāwanatanga te Rōpū Mātanga Tohutohu mō Te Oranga Tangata hei arotake i te pūnaha Oranga Tangata i Aotearoa, hāunga ngā Pūtea Kaumatua, te Penihana mō ngā Morehu o te Pakanga, ngā Penihana Pakanga, me te Pūnaha Tautoko Ākonga. Nā te whānui o ngā ritenga mahi me te tū motuhake i tautohutia mō te Rōpū Mātanga Tohutohu i te Oranga Tangata, kātahi anō ka wātea he rōpū kia kawe arotakenga pēnei rawa te torowhānui o te pūnaha katoa, o tēnei whakatupuranga tangata.
I roto i tēnei pūrongo, e whiriwhiri ana mātou i te tū tauaro o te oranga ki te ao kaimahi, whiwhinga mahi hoki, ki te hauora hinengaro, ki te oranga tamariki, ki te rawakore o te tamariki, me ngā rautaki whāinga whare, whakawā anō hoki. He mea āta whiriwhiri ā mātou tohutohu, he mea pou ki runga i ngā kōrero taunaki tōtika, ā, mā te nui mā te ranea o te haumi rawa anake e puta ai ngā hua e wawatatia ana ki te ao. E tautohu ana mātou kia whakatikaina te pūnaha oranga tangata kia taea e ia ōna mahi taketake te whakatutuki, kia nuku noa ake tātou i ngā tikanga ‘hao i te hunga kua raru’ kia noho kē ko te ‘whakamana tāngata’ hei kaupapa – te whakaū i te tū rangatira o te tangata kia taea e rātou te whai wāhi ki ō rātou whānau me ō rātou hapori
Ko ngā tino mātāpono o te whakamana tāngata he hora i ngā taunakitanga pūtea e pai ai te noho, e tautokona ai te tangata i te taha tūranga mahi i te wā e kimi mahi pai, mahi tōtika ana ia, me te atawhai i te hunga ka whiwhi i ēnei tautoko i runga i te tū rangatira me te whakaute i tōna mana. Tēnā ko tēnei, mō te hunga ka whiwhi tautoko pēnei, ko te hiahia o te katoa kia tahuri ki te whai i ngā huarahi e whai wāhi ai ki ngā mahi a te katoa. Te tūmanako kia kitea he kirimana e noho ai ēnei mātāpono hei kahupapa mō tētahi aronga ā-ngākau i te Whare Pāremata ki te oranga tangata, e tino kawea whakamuatia a Aotearoa i runga i te harikoa ki te pai o ngā mahi.
He mea āta tārei tenei pūrongo nā te whakawhitiwhiti kōrero huri i te motu, nā ngā pūrongo i tonoa kia tuhia, nā tētahi arotakenga i ngā pūranga pukapuka me ngā raraunga mō te whakamahi putea oranga, i ētahi atu pūrongo tae atu ki ō mua arotake i te pūtea oranga, me ngā hui ki te hunga whai pānga.
Tēnei mātou te aumihi nei ki ngā tāngata katoa nāna i tāpae kōrero ki tā mātou pūrongo, tae atu ki ngā tāngata katoa i huri mai ki te tuku kōrero mō ō rātou tūtakitanga ki te pūnaha pūtea oranga
Ahorangi Cindy Kiro, Heamana
Te Rōpū Mātanga Tohutohu mō te Oranga Tangata
Rārangi o muri (mauī ki matau): Dr Michael Fletcher (special advisor), Phil O’Reilly, Trevor McGlinchey, Charles Waldegrave, Kay Brereton, Professor Innes Asher, Robert Reid
Rārangi o mua (mauī ki matau): Professor Tracey McIntosh, Dr Ganesh Nana, Dr Huhana Hickey, Professor Cindy Kiro (Chair), Latayvia Tualasea Tautai
He Kupu Whakamihi
He tokomaha tonu ngā tangata nāna i akoako i tautoko hoki ngā mahi a ngā mema 11 o te Rōpū Mātanga Tohutohu mō te Oranga Tangata.
E hiahia ana mātou ki te whakamoemiti ki ngā tāngata katoa i tahuri mai ki te tūtaki ā-kanohi ki a mātou i ngā kōrerorerotanga me ngā hui – e mōhio ana mātou ki te uaua, e mārama ana ki ngā taumahatanga mā koutou, nā reira ka nui te mihi atu. Tēnei hoki te mihi nui ki te hunga nāna i whakakī tā mātou uiui, i tuku tāpaetanga mai hoki. He rawe ngā tāpaetanga, he torowhānui, he tino whai take mō ā mātou mahi.
Kei te hari mātou mō ngā tāpaetanga kōrero o te hunga i ā mātou wāhi tēpu porohita i Te Whanganui-a-Tara me Tāmakimakaurau, ā, tēnei hoki te whakamoemiti ki a Tiaki Andrew Becroft rāua ko Ahorangi Jonathan Boston mō rāua i arataki i te wāhanga i Te Whanganui-ā-Tara.
Me tuku anō hoki i te kupu whakamoemiti ki ā mātou kaiarataki kōrero tokorua, ki a Cindy Rock rāua ko Tima Howard, nā rāua i pōwhiri te tini tangata kia whai wāhi mai ki ngā kōrero, me te whakahihiko i te katoa.
Ka whakamoemiti rā ki ngā ratonga, ki ngā whakahaere me ngā tāngata takitahi i hōmai kōrero, tohutohu, whakaaro rānei ki a mātou. Ka nui te whakawhetai ki a Neavin Broughton, ki a Tākuta Sacha McMeeking, ki a Ahorangi Damon Salesa, ki a Rachel Noble, ki a Tākuta Rosemary Marks me Ahorangi Professor Richie Poulton.
He maha tonu ā mātou kaiāwhina i āwhina ki te torotoro atu ki ngā hapori i ō rātou takiwā i roto i ngā hui, me kore ake rātou i rongo kōrero mai mātou i te tini i tāpae kōrero mai, nā reira e kore e mutu ngā mihi ki ngā kaiāwhina. Kei te mihi hoki te ngākau ki ngā iwi o tēnā rohe, o tēnā rohe, ki ngā marae, ki ngā rōpū kaitautoko, hapori hoki, ki ngā kaitohutohu takawaenga i ngā hapori, ki ngā kaikōmihana ā-takiwā, ki ngā kura, ki ngā whakahaere hauora taketake, ki Ngā Kaiwhakamāori Reo Rotarota o Aotearoa, ki te Karapu Kirikiti o Naenae Old Boys me ngā whare karakia, hapori hoki i whakawātea mai i ō rātou whare hei wāhi hui. Kei te mihi hoki ki te Wellington City Mission, ki Kapiti Youth Service, ki Lifewise, ki Wesley Community Action me te People’s Project.
Hei whakamutunga hoki e whakamoemiti ana ki tā mātou Kaitohutohu Motuhake ki a Tākuta Mikaere Fletcher, mō ana mōhiotanga hōhonu ki te pūnaha hauora, me ngā mema Kaitohutohu mō ō rātou tohutohu, mahi nui hoki.