O lau ta'iala mo le palota i le palota laititi a Hamilton Sisifo

Palota i le faigāpalota laititi a Hamilton Sisifo

E amata ona palota i le palota laititi a Hamilton Sisifo i le Aso Gafua 28 o Novema. O lou avanoa mulimuli e te palota ai o le aso o le palota, Aso Toona'i 10 o Tesema

Ia mautinoa ua e lesitala ma ua toe faafou ou faamatalaga.

Ina ia palota, e tatau ona e lesitala. E te agavaa e lesitala lou suafa ma faatino lau palota, pe afai ua 18 tausaga o lou soifua pe sili atu, o oe o se sitiseni Niu Sila pe ua e nofomau, pe iai foi se taimi i lou soifua na e nofo ai lava i Niu Sila mo le umi e 12 masina pe sili atu. E na'o le palota laititi a Hamilton Sisifo e mafai ona e palota ai pe afai sa e lesitala i le palota lautele a Hamilton Sisifo.

O au pepa mo le EasyVote

Afai e oo atu i le Aso Lulu 2 o Novema ua uma ona lesitala lou suafa, o le a maua atu i lau pusameli pepa mo le EasyVote.

O au pepa mo le EasyVote e faailoa atu ai le aso e mafai ona e palota ai ma le sui tauva e mafai ona e palota i ai. O au pepa palota e aofia ai ma lau EasyVote card, e faigofie ma vave ona faatino ai lau palota. E mafai lava ona e palota e aunoa ma lau EasyVote card, ae fai si umi e faatino ai.

Afai e te lesitala ae ua te'a le Aso Lulu 2 o Novema, e aofia ai ma le aso o le faigāpalota, e lē maua atu lau EasyVote card. E tatau ona fai sau palota faapitoa ma o le a umi se taimi.

Lesitala, siaki pe faafou ou faamatalaga i luga o le initaneti.

E faigofie ona lesitala, siaki pe faafou ni suiga o au faamatalaga. Alu i luga o le initaneti i le vote.nz e siaki po ua e lesitala. E mafai ona e lesitala pe faafou ou faamatalaga i le vote.nz e faaaoga ai lou laisene avetaavale Niu Sila, tusifolau Niu Sila poo le pepa faamaonia o le RealMe, pe vala'au le 0800 36 76 56 e faatalosaga mo se pepa lesitala ina ia lafoina atu iā te oe.

Ia e palota vave

O le a faia le faigāpalota laititi a Hamilton Sisifo i le Aso Toona'i 10 o Tesema. Vave palota ina ia faaitiitia ai le umi o le laina - e le tatau ona e faatali i le aso o le faigāpalota.

E tatala le palota i le: Aso Gafua 28 o Novema

E tapunia palota i le: 7pm i le aso o le palota, Aso Toona'i 10 o Tesema

Tagata palota Hamilton Sisifo

E aofia i le faigāpalota a Hamilton Sisifo ia nuu o loo iai i le aai o Hamilton i le itu i sisifo o le Vaitafe o Waikato e aofia ai Melville, Frankton, Nawton, Pukete, ma Te Rapa. E aofia ai foi Woodridge ma vaega o Flagstaff, lea o loo iai i le itu i sasa'e o le Vaitafe o Waikato.

Palota i faigāpalota a Hamilton Sisifo

E mafai ona e palota mai le Aso Gafua 28 o Novema se'ia oo i le Aso Faraile 9 o Tesema i soo se nofoaga mo palota e vave fai. E mafai foi ona e lesitala, siaki pe faafou ou faamatalaga i le taimi lava lea.

E eseese aso ma taimi e tatalaina ai nofoaga mo palota e vave faia. Siaki muamua ae e te le'i aga'i e fai lau palota i le vote.nz.

I le aso o le faigāpalota, Aso Toona'i 10 o Tesema, o nofoaga uma e faatino ai palota o le a tatalaina mai le 9am e oo atu i le 7pm. E mafai ona e lesitala i le aso o le faigāpalota, ae mana'omia fo'i le faia o lau palota faapitoa ma e umi ai se taimi.

O faamatalaga e faatatau i le nofoaga ma le taimi e palota ai, ma le sui e mafai ona e palota i ai, o le a maua i le vote.nz pe vala'au le 0800 36 76 56. O le a tuuina atu fo'i faatasi ma au pepa mo le EasyVote.

Faapefea ona palota

1. Taua'ao mai lau EasyVote card

Aumai lau pepa EasyVote ina ia faavave ai le faiga o lau palota. E mafai lava ona e palota pe afai e galo pe leai foi sau pepa lena

2. Mulimulita'i i faatonuga

O le a faasino atu e le aufaigaluega i le nofoaga e te palota ai le mea e fai ma le vaega e te aga'i iai.

3. Palota i le faigāpalota laititi a Hamilton Sisifo

E tasi lava lau palota, mo le sui tauva ua e finagalo e avea ma ou sui usufono i le Palemene.

E eseese ma le palota lautele o lea e faatino ai le lua o au palota - e tasi lau palota mo le pāti filifiliina ma le isi tasi mo lou sui tauvā.

4. Lau palota mo lou itumālo faapalota

O lau palota faaitumālo faapalota e mo le filifiliina o le sui tauvā e te finagalo e avea ma sui usufono o le Palemene o le nofoaga o loo e aumau ai. O le sui tauvā e tele ana palota mai le tou itumālo faapalota e avea ma sui usufono o le Palemene a lou itumalo.

Tuu se togi i luga o lau pepa palota mo le suafa o le sui tauvā ua e finagalo atoatoa i ai e sui tulaga mo lou pitonuu.

5. Tuuina atu lau pepa palota i totonu o pusa palota ua mae'a ona saunia

Ma e pau lava lea- ua mae'a lau palota!

O fea e maua ai nisi faamatalaga mo le lesitalaina ma le faatinoina o palota

• Asiasi i le vote.nz

• Vala'au le 0800 36 76 56

• Asiasi i le facebook.com/voteNZ

Afai e te silafia se tasi e fesoasoani i ai nei faamatalaga, faamolemole faailoa atu i ai.

O faamatalaga e uiga i le lesitalaina ma le faatinoina o palota o loo maua i isi gagana i le vote.nz

Ua le mafai ona e aga'i atu i se nofoaga mo palota?

Pe afai e faigata pe le mafai ona e aga'i atu i se nofoaga e faatino ai lau palota, o loo iai nisi avanoa ina ia mautinoa e mafai pea ona e palota. Afai o loo e aumau i se fale mo tagata matutua, o le a fesoota'i atu e le Pule o Faigāpalota le pule o le fale ina ia faatulaga auaunaga mo le faatinoina o palota.

Afai e le mafai ona e aga’i atu i le falepalota ona o loo taofia oe i le falema'i, mai le Aso Gafua 28 o Novema, e mafai e se uo poo se tagata o lou aiga ona avatua au pepa palota.

Afai e lē mafai ona e aga'i i le nofoaga o loo faia ai le palota, mo se faata'ita'iga, ona o ma'i o le tino, le soifua matua poo le lē atoatoa o le malosi o le tino, e mafai ona e maua se fesoasoani e fai ai lau palota. Sailiili atili i le vote.nz pe vala'au le 0800 36 76 56 e faatalanoa ni au filifiliga.

Palota mai atunu'u mamao

Afai e te palota mai atunuu mamao, e tatau ona oo atu i le vaeluaga o le po o le Aso Faraile 9 o Tesema, ua mae'a ona e lesitala mai. E mafai ona e lesitala pe faafou ou faamatalaga i le vote.nz

E mafai ona e palota mai i atunuu mamao mai le Aso Lulu 23 o Novema se'ia tā le 7pm, Aso Toona'i 10 o Tesema (Taimi NZ)

O le auala faigofie ma vave e palota mai ai i atunuu mamao o le download ma faatumu au pepa palota ona tuu atu lea (upload) i le vote.nz

E mafai foi ona e agai sa'o lava oe e te palota a'o e iai i atunuu mamao i se nofoaga o faigāpalota i Lonetona poo Sini, pe fesili foi iai ina ia lafo atu iā te oe pepa palota. Afai e le talafeagai mo oe nei vaega o filifiliga, faamolemole faafesoota'i mai matou.

Asiasi i le vote.nz mo se faamatalaga lata mai e uiga i le palota mai atunuu mamao. Afai e te mana'omia se fesoasoani e palota mai ai i atunuu mamao, faamolemole faafesootai mai matou.

meli: overseas@vote.nz

Telefoni mai atunuu mamao: +64 9 909 4182 (e ono totogiina telefoni mai fafo)

Telefoni mai Niu Sila: 0800 36 76 56

Manaomia se fesoasoani i le faitauina poo le faailogaina o lau pepa palota?

E mafai ona fesoasoani atu se uo, se tagata o lou aiga poo se tagata faigaluega o le ofisa o palota i le faitauina poo le faailogaina o lau pepa palota. O lena tagata e mafai ona:

• lua aga'i faatasi atu i tua o le laulau faipalota

• faitau leotele upu ma faamatalaga o i luga o pepa palota

• maka pepa palota mo oe pe a e finagalo ai latou te makaina.

E lē mafai ona latou tauanauina oe i se sui e te palota ai i le palota laititi a Hamilton Sisifo.

Afai e te tauaso, tau le manino lau vaai pe iai foi ni ou mana'oga faapitoa, o lona uiga e le mafai ona e makaina lau pepa palota e aunoa ma se fesoasoani, e mafai ona e palota e fa'aaoga ai auaunaga o telefoni.

E tatau ona e lesitala ina ia fa'aaogaina lenei auaunaga. Vala'au 0800 028 028 ma filifili le numera 1 e lesitala ai.

E mafai ona e lesitala mai le Aso Tofi 3 o Novema se'ia tā le 12pm i le Aso Toona'i 10 o Tesema.

Asiasi i le vote.nz e saili ai nisi faamatalaga e uiga i lenei auaunaga.