Ko e tohi fakahinohino ki ho‘o kau ‘i he Fili-Si‘i ‘a e vāhenga fili Tauranga

Kau ‘i he Fili-Si‘i ‘a e vāhenga fili Tauranga

‘Oku kamata ‘a e Fili-Si‘i ‘a e vāhenga Tauranga ‘i he ‘aho Tokonaki 4 ‘o Sune. Ko e faingamālie faka‘osi ke fakahoko ai ho‘o fili, ko e ‘aho Tokonaki 18 ‘o Sune.

Fakapapau‘i ‘oku ke ‘osi lēsisita pea ‘oku tonu kotoa ‘a e ngaahi fakamatala ko iá.

‘E fiema‘u ke ke ‘uluaki lēsisita pea ke toki fili. Manatu‘i kuopau ke ke lēsisita kapau ‘oku ke ta‘u 18 pe motu‘a ange, ‘osi sitiseni New Zealand pe ma‘u pepa nofo fonua, pea kuo ke ‘osi nofo ma‘u hokohoko ‘i New Zealand ‘i he māhina ‘e 12 pe toe lōloa ange lolotonga ho‘o mo‘uí. ‘E toki lava pe ke ke kau he Fili-Si‘i ‘a Taurangá kapau ‘oku ke lēsisita ‘i he vāhenga fili Tauranga.

Tomu‘a lēsisita ke vave mo faingofua ange ai ho‘o filí

Kapau te ke lēsisita kimu‘a he ‘aho Pulelulu 11 ‘o Mē, ‘e meili‘i atu kia koe ho‘o peketi fili EasyVote fakafuofua ki he uike ‘e ua kimu‘a he ‘aho fili.

‘E fakahā atu ‘i ho‘o peketi fili EasyVote ‘a e taimi ke ke fili aí mo hai te ke lava ‘o fili ai. ‘E ‘oatu ai foki ai mo ho‘o kaati fili EasyVote card ke vave mo faingofua ange ai ho‘o fili. ‘E lava pē ke ke fili ta‘ekaati EasyVote card, ka ‘e ki‘i tuai ange.

‘E kei lava pē ke ke lēsisita hili e ‘aho Pulelulu 11 ‘o Mē, kau ai mo e ‘aho fili, ka he ‘ikai ke ma‘u atu ha‘o kaati EasyVote. ‘E toe fiema‘u foki ke ke fili makehe (special vote) koe, pea ‘e tuai ange ia.

Lēsisita, pea ke hu ‘onilaini ‘o vakai pe ‘oku tonu kotoa ‘a e fakamatala fekau‘aki mo koe ‘i he lēsisita

‘Oku faingofua ‘a e lēsisitá mo hono vakai‘i mo fakatonutonu ‘a e fakamatala ‘oku ‘osi fakahū ki ai. Hū ‘onilaine pe ki he vote.nz ‘o vakai‘i ai pe kuo ke ‘osi lēsisita. ‘E lava ke ke lēsisita pe fakatonutonu ‘a e fakamatala fekau‘aki mo koe ‘i he vote.nz ngāue‘aki ho‘o laiseni faka‘uli New Zealand, paasipooti New Zealand pe RealMe, pe telefoni ki he 0800 36 76 56 ‘o kole ke lī atu he meilí ha‘o foomu lēsisita.

Tomu‘a Fili

‘E fakahoko ‘a e Fili-si‘i ‘a e vāhenga fili Tauranga ‘i he ‘aho Tokonaki 18 ‘o Sune. Tomu‘a fili koe‘uhi ke si‘isi‘i ange ‘a ho‘o taimi tatali - ‘e ‘ikai fiema‘u ia ke ke tali ki he ‘aho filí ke toki fakahoko ai ho‘o filí.

Kamata e fili: Tokonaki 4 ‘o Sune

Tāpuni e fili: 7.00pm ‘i he ‘aho filí, Tokonaki 18 ‘o Sune

Vāhenga fili Tauranga

Ko e vāhenga fili Tauranga ‘oku kau ki ai ‘a e kolo ko Tauranga mo e ngaahi kolo tu‘u takai ‘o ngata faka-hihifo mei he vaitafe Wairoa River pea ko e Waiorohi Stream ‘i he faka-hahake. ‘Oku kau ai ‘a e kolo ko Mt Maunganui mo e mala‘e vakapuna Tauranga Airport

Fili ‘i he Fili-Si‘i ‘a Tauranga

‘E lava ke ke fili mei he ‘aho Tokonaki 4 ‘o Sune ki he ‘aho Falaite 17 ‘o Sune ‘i ha fa‘ahinga fai‘anga Tomu‘a Fili. ‘E toe lava pe ke ke lēsisita, vakai‘i pe fakatonutonu ‘a e fakamatala fekau‘aki mo koe ‘i he lēsisita ‘i he taimi pē ko iá.

‘Oku kehekehe pe ‘a e ‘aho mo e taimi ‘oku ava ai ‘a e fai‘anga Tomu‘a Fili takitaha. ‘Uluaki vakai‘i ‘i he uepisaiti vote.nz pea ke toki ‘alu ‘o fili.

‘I he ‘aho filí, Tokonaki 18 ‘o Sune, ‘e ava ‘a e ngaahi fai‘anga fili kotoa pe mei he taimi 9am ki he 7pm. ‘E lava pe ke ke lēsisita he ‘aho filí, ka ‘e fiema‘u ke ke fakahoko ‘a e fili makehe (special vote) ‘a ia ‘e ki‘i tuai ange.

Ko e ngaahi fakamatala fekau‘aki mo e feitu‘u pea mo e taimi fili, mo hai ‘e lava ke ke fili ai, ‘e toki tuku atu ia he taimi 4pm ‘aho Tusite 17 ‘o Mē ‘i he vote.nz pe telefoni ki he 0800 36 76 56. ‘E ‘oatu ‘a e fakamatala ko iá ‘i ho‘o peketi fili EasyVote.