Tō aratohu mō te pōti i te pōtitanga motuhake o Tauranga

Pōti i te pōtitanga motuhake o Tauranga

Ka tīmata te pōti i te pōtitanga motuhake o Tauranga hei te Rāhoroi te 4 o Hune. Ko tō whai wāhitanga whakamutunga mō te pōti ko te rā pōti, Rāhoroi te 18 o Hune

Me whakarite kua rēhita koe, ā, kei te tika ō taipitopito.

Kia āhei koe ki te pōti, me rēhita koe. Me mātua rēhita koe mēnā 18 tau tō pakeke, neke atu rānei, he kirirarau hoki, kainoho tūturu rānei nō Aotearoa, ā, neke atu i te 12 marama rānei tō noho ki Aotearoa i te wā kotahi. Ka āhei anake koe ki te poti i te pōtitanga motuhake o Tauranga mēnā kua rēhita koe ki te rohe pōti whānui o Tauranga.

Me moata te rēhita kia tere ai, kia māmā ai te pōti

Mēnā ka rēhita koe i mua o te Wenerei 11 o Mei, ka whiwhi koe i tētahi mōkī EasyVote i rō mēra i te 2 wiki i mua o te rā pōti.

Kei roto i tō mōkī EasyVote ngā tohutohu ki a koe mō te wā e taea e koe te pōti, ā, me te hunga hei pōti. Kei roto anō i tō mōkī ko tō kāri EasyVote e hāngai ana ki a koe, kia tere ake, kia māmā ake ai te pōti. Ka taea tonu te pōti me te kore kāri EasyVote, engari he roa ake pea.

Ka taea e koe te rēhita ā muri i te Wenerei 11 o Mei, tae atu ki te rā pōti, engari kāore koe e whiwhi i tō kāri EasyVote. Me tuku pōti motuhake anō koe, ā, he roa ake tēnei.

Me rēhita, me tirotiro, me whakahou tuihono rānei i ō taipitopito

He māmā noa iho te rēhita, te tirotiro, te whakahou rānei i ō taipitopito. Haere tuihono ki vote.nz hei tiro mēnā kua rēhita koe. Ka taea e koe te rēhita, te whakahou rānei ō taipitopito i vote.nz mā tō raihana taraiwa o Aotearoa, te uruwhenua o Aotearoa, te tuakiri whakatūturu o RealMe, waea rānei ki 0800 36 76 56 hei tono mō tētahi puka rēhita kia tukuna ki a koe.

Me moata te pōti

Ka tū te pōtitanga motuhake o Tauranga ā te Rāhoroi te 18 o Hune. Me moata te pōti kia iti ake te wā e pau ki te rārangi tū — ehara i te mea me tatari koe mō te rā pōti ki te tuku pōti.

Ka tuwhera ngā pōti: Rāhoroi 4 Hune

Ka kati ngā pōti: 7.00pm i te rā pōti, Rāhoroi 18 o Hune

Rohe pōti o Tauranga

Kei roto i te rohe pōti o Tauranga ko te tāonenui o Tauranga me ōna takiwā paetata,e roherohetia ana ki te uru mā te awa o Wairoa, ā, ki te rāwhiti mā te kōawa o Waiōrohi. Kei roto ko Mauao me Te Taunga Rererangi o Tauranga.

Te pōti i roto i te pōtitanga motuhake o Tauranga

Ka taea e koe te pōti atu i te Rāhoroi te 4 o Hune ki te Paraire te 17 o Hune i tētahi wāhi pōti tōmua. Ka taea anō e koe te rēhita, tirotiro, whakahou rānei ō taipitopito i taua wā anō.

He rerekē ngā rā me ngā wā ina huaki ana ngā wāhi pōti tōmua. Me tirotiro i mua i tō haere ki vote.nz.

I te rā pōti, te Rāhoroi te 18 o Hune, ka tuwhera ngā wāhi pōti katoa mai i te 9am ki te 7pm. Ka taea e koe te rēhita i te rā pōtitanga, engari me tuku anō e koe he pōti motuhake, ā, he roa ake tēnei.

Ka wātea mai ngā kōrero mō ngā wāhi me te wā pōti, ā, me te hunga hei pōti māu, mai i te 4pm Wenerei te 17 o Mei i vote.nz, me waea atu rānei ki 0800 36 76 56. Ka whakaurua anō ki tō mōkī EasyVote.